گلگت بلتستان میں وکلاء پر حملے کے خلاف وکلاء تنظیموں کا احتجاج، 18، 19 اور 20 نومبر کو عدالتی کارروائیوں کے بائیکاٹ کا اعلان
ہنزہ:گلگت بلتستان میں وکلاء پر مبینہ مسلح حملے کے خلاف گلگت بلتستان بار کونسل، گلگت بلتستان ہائی کورٹ بار ایسوسی ایشن اور مختلف ڈسٹرکٹ بار ایسوسی ایشنز نے شدید احتجاج کرتے ہوئے حملے میں ملوث ملزمان کی فوری گرفتاری، سخت قانونی کارروائی اور وکلاء کو مکمل تحفظ فراہم کرنے کا مطالبہ کیا ہے۔ وکلاء تنظیموں نے واقعے کے خلاف عدالتی کارروائیوں کے بائیکاٹ کا بھی اعلان کر دیا ہے۔
جاری کردہ مشترکہ مؤقف اور مختلف بار ایسوسی ایشنز کے اعلامیوں کے مطابق 17 نومبر 2026 کو ایڈووکیٹ منظور عباس اور ایڈووکیٹ سجاد کیانی، سیشن کورٹ میں پیشی کے لیے علی آباد جا رہے تھے کہ پیٹرول پمپ کے قریب تقریباً 15 سے 20 نامعلوم مسلح افراد نے ان پر حملہ کر دیا۔ حملہ آوروں نے وکلاء کو تشدد کا نشانہ بنایا، جس پر گلگت بلتستان کی وکلاء برادری میں شدید تشویش اور غم و غصہ پایا جاتا ہے۔
گلگت بلتستان ہائی کورٹ بار ایسوسی ایشن، ڈسٹرکٹ بار ایسوسی ایشن گلگت اور ڈسٹرکٹ بار ایسوسی ایشن استور نے واقعے کی شدید مذمت کرتے ہوئے کہا ہے کہ وکلاء معاشرے میں انصاف کی فراہمی، قانون کی حکمرانی اور بنیادی انسانی حقوق کے تحفظ کے لیے اہم کردار ادا کرتے ہیں۔ وکلاء پر اس نوعیت کے حملے نہ صرف انفرادی جان و مال بلکہ قانونی برادری کی عزت، وقار، پیشہ ورانہ آزادی اور عدلیہ کی خودمختاری کے لیے بھی سنگین خطرہ ہیں۔
بار ایسوسی ایشنز نے مطالبہ کیا ہے کہ حملے میں ملوث تمام ملزمان کو فوری گرفتار کرکے قانون کے مطابق سخت کارروائی کی جائے، واقعے کی شفاف اور غیر جانبدارانہ تحقیقات کی جائیں اور ملزمان کو قرار واقعی سزا دلوائی جائے۔ پولیس اور متعلقہ قانون نافذ کرنے والے اداروں سے بھی مؤثر اقدامات اور وکلاء کو جان و مال کا مکمل تحفظ فراہم کرنے کا مطالبہ کیا گیا ہے۔
دوسری جانب گلگت بلتستان ہائی کورٹ بار ایسوسی ایشن اور ڈسٹرکٹ بار ایسوسی ایشنز گلگت و استور نے 18 نومبر 2026 بروز بدھ مکمل عدالتی ہڑتال اور بائیکاٹ کا اعلان کیا ہے، جس کے تحت گلگت بلتستان کی تمام متعلقہ عدالتوں میں وکلاء عدالتی کارروائیوں میں پیش نہیں ہوں گے۔ ڈسٹرکٹ بار ایسوسی ایشن استور نے یہ بھی مطالبہ کیا ہے کہ متاثرہ وکلاء کے خلاف کسی قسم کی انتقامی یا تادیبی کارروائی نہ کی جائے۔
ادھر گلگت بلتستان بار کونسل نے اپنے الگ نوٹس میں 19 اور 20 نومبر 2026 بروز جمعرات اور جمعہ کو گلگت بلتستان بھر کی تمام عدالتوں میں مکمل عدالتی بائیکاٹ کا اعلان کیا ہے۔ بار کونسل نے واضح کیا ہے کہ وکلاء کے تحفظ اور ان کے جائز مطالبات کی منظوری تک احتجاجی مؤقف برقرار رکھا جائے گا۔
وکلاء تنظیموں نے تمام ضلعی بار ایسوسی ایشنز اور وکلاء برادری سے اپیل کی ہے کہ وہ اس مشکل وقت میں متاثرہ وکلاء کے ساتھ اظہار یکجہتی کریں اور اتحاد و اتفاق کے ذریعے اپنے جائز مطالبات کے حصول کے لیے مشترکہ جدوجہد جاری رکھیں۔
وکلاء رہنماؤں کا کہنا ہے کہ عدلیہ کی آزادی، قانون کی بالادستی اور وکلاء کے تحفظ پر کوئی سمجھوتہ نہیں کیا جا سکتا۔



